Lëtzebuerger Informatiksolympiad

D’Lëtzebuerger Informatiksolympiad ass déi nei Versioun vum fréieren Concours Informatique Luxembourgeois (CIL), deen zënter 1991 vum SCRIPT respektiv dem Centre de Technologie de l’Éducation (CTE) organiséiert gëtt. Am Joer 2025 gëtt de Concours fir déi 34. Kéier organiséiert.

De Concours huet zum Zil, jonk Schüler mat spezielle Fäegkeeten an der Léisung vu Problemer um Computer, dem Design vun Algorithmen an der Ëmsetzung vu Programmer mat Hëllef vun enger Programméiersprooch ze identifizéieren.

De Concours steet alle Schüler aus ëffentlechen, private an internationale Lycéeën am Groussherzogtum Lëtzebuerg op, ouni Alterslimit.

D’Lëtzebuerger Informatiksolympiad 2025 gëtt an 4 Ronne organiséiert:

• d’Qualifikatiounsronn;

• d’Halleffinallen;

• d’Programméierungs- an Algorithmiktrainingen;

• d’Finallen.

Déi akzeptéiert Programméiersprooche fir d’Qualifikatiounsronn an d’Halleffinallen sinn C/C++, Java an Python 3 (C/C++ gëtt bevorzugt wéinst der Effizienz bei der Ausféierung). An de Finallen ass nëmmen C/C++ erlaabt, well dëst déi offiziell Programméiersprooch fir international Concoursen ass.

All Informatiounen iwwert de Concours fënnt een op der Websäit www.infosolympiad.lu.

Traditionell ginn déi 4 Gewënner vun der Lëtzebuerger Informatiksolympiad automatesch ausgewielt, fir Deel vun der offizieller lëtzebuergescher Delegatioun ze sinn, déi d’Faarwe vum Groussherzogtum Lëtzebuerg bei der Internationaler Informatikolympiad (IOI) vum selwechte Joer vertrëtt. Déi 4 beschte weiblech Participanten am nationale Concours wäerten un der Europäescher Meederchersolympiad an der Informatik (EGOI) deelhuelen an héchstens 6 Finaliste wäerten un der Westeuropäescher Informatikolympiad (WEOI) deelhuelen.